Ulrich

von Winterstetten

19. Ulrich von Winterstetten

1. Sumer, dîner lieben künfte (KLD 59.XIV)

1 Sumer, dîner lieben künfte
bin ich frô, du hâst gewalt.
dîner hôhen sigenünfte
fröit sich anger und der walt.
5 in dem walde hoert man singen,
kleine vogel suoze erklingen,
ûf dem anger schône entspringen
siht man bluomen manicvalt.
diu zît wart nie sô wol gezieret:
10 ich hân des meien bluot erzwieret.
die wil ich prîsen mit gesange,
swie doch mîn kumber wert ze lange.
ich bin tump daz ich mîn langez leit den liuten singe.
manger sprichet 'seht, dest wâr, ez wigt in harte ringe.'
15 ich waer sicherlîchen tôt, wan daz mich nert gedinge
daz ich noch den kumber mîn ze liebem ende bringe.
sol ich iemer frô bestân,
sô muoz Minne und diu vil minneclîche mich von sorgen lân.

2 Liehte bluomen, zît des meien,
vogel singen hilfet niht.
sihe ich tanzen unde reien,
swes diu welt ze fröiden giht,
5 doch sô trûrent mir die sinne;
ungemüete wont mir inne,
sît mir von der süezen Minne
weder liep noch trôst geschiht.
mich hât der wessen Minne strâle
10 verwundet niht zem êrsten mâle.
der alte kumber hât mich sêre
verwunt: waz sol diu rede nu mêre?
Minne wil ir alten ungenâde an mir nu niuwen.
ich gelepte nie sô gar in kumberlîchen riuwen,
15 sî wil in sendem herzen grôze sorge briuwen:
der ich ie getriuwe was, diu wil mir nicht getriuwen.
sol ich iemer frô bestân,
sô muoz Minne und diu vil minneclîche mich von sorgen lân.

3 Mich nimt wunder ob diu reine
habe gesetzet in ir muot
daz si mich in herzen meine
sam si mit den ougen tuot.
5 seht, sô muoz ich gar verderben.
möhte ich lieben blic erwerben,
dar nâch in ir gruoze sterben,
sô waer doch daz ende guot.
si smâhet mich mit liehten ougen:
10 waer ich ir in ir herzen tougen,
sô müesten ougen nâch dem herzen
mir büezen kumberlîchen smerzen,
den ich nû vil lange hân von sus getânen sachen:
diu vil liebe wolte mir ze fröiden nie gelachen;
15 doch muoz ich ir mit gedanke nahtes dicke erwachen,
daz man möhte hoeren mir daz herze ûz jâmer krachen.
sol ich iemer frô bestân,
sô muoz Minne und diu vil minneclîche mich von sorgen lân.

4 Swâ man minneclîche lachet,
hât dâ Minne niht gewalt,
sôst ir hôher prîs verswachet,
sol si dâ sîn abe gezalt.
5 man mac wol an mîner frouwen
minneclîchez lachen schouwen.
ist diu minne an ir verhouwen,
sôst si doch dar nâch gestalt.
swer ir vil liehten ougen saehe,
10 wie der nâch mînem sinne jaehe!
diu schoene hât vil hôch gemüete,
kiusch unde rehte wîbes güete.
in gesach nie schoener wîp und alsô wol gebâren,
in gesach sô rôten munt bî allen mînen jâren,
15 in gesach nie wîbes lîp sô reinen und sô klâren;
doch kan sî wol mit gebaerden mannes herzen vâren.
sol ich iemer frô bestân,
sô muoz Minne und diu vil minneclîche mich von sorgen lân.

5 Ob diu liebe fürhtet sünde,
dem tuot sî doch niht gelîch.
hât si guoter liute künde,
die sint mit ir sünden rîch,
5 daz sî ir niht gebent ze buoze
daz si müeste mir vil suoze
lachen unde in liebem gruoze
gen mir nîgen minneclîch.
ir bîhter hânt niht rehter sinne:
10 si geltent minne mit unminne;
sô wirt der sünde deste mêre.
si solten wîsen rehte lêre.
ob si mir ir gruoz verseit, der ich hân wol gesprochen,
sâ zehant wirt minne mit unminne an mir gerochen.
15 sî hât an getriuwem friunde triuwe gar zerbrochen;
dâ von ist mîn hôher muot in leide gar betrochen.
sol ich iemer frô bestân,
sô muoz Minne und diu vil minneclîche mich von sorgen lân.