Christian v. H.

Home
Nach oben

 

 

Christian

von Hamle

13. Christian von Hamle

1. Von froelîchem lîbe mit armen umvangen (KLD 30.I)

1 Von froelîchem lîbe mit armen umvangen,
ze herzen gedrücket,wie sanfte daz tuot;
von trôstlîchem wîbe mit roeslehtem wangen
vor liebe gelachet, daz fröiwet den muot.
5 dâ sint zwei herze und ein einiger lîp,
mit worte underscheiden, ein man und ein wîp:
dâ muoz diu sorge ze stücken zebrechen.
sô lât sie diu liebe ûz ietwederes munde
bî langer zîte kein wort nicht ensprechen.
10 dâ mac man küssen den süezesten munt
der ie noch manne von frouwen wart kunt.

2 Ein twingen von frouwen daz macht mannes herze
bî wîlen trûric und bî wîlen frô.
swer sie sol schouwen sunder huote smerze,
fröid obe aller fröide er vindet dâ hô.
5 swâ sich vier arme gesliezen enein,
nie süezer fröide der sunne überschein.
swer solhen trôst weiz an lieplîchem wîbe,
ja enist ze der werlte niht bezzerre fröide
dâ mite man baz die sorge vertrîbe.
10 dâ wirt gedruht von zwein herzen sô nâ,
loup wart nie sô dünne daz stat funde dâ.

3 Swâ sich vier ougen sô gerne gesehen,
dâ müezen zwei herze ouch ein ander holt sî.
sie grüezent sich tougen, swaz in mac geschehen;
fröide und trûren wont in beidez bî.
5 dâ brennet diu minne vor liebe als ein gluot.
dannoch groezer wunder diu liebe dâ tuot.
sie lât sich münde an ein ander vergezzen.
al dâ hât diu liebe mit maneger fröide
sorge unde trûren vil gar übersezzen,
10 al dâ hât diu liebe die minne überwegen.
wol iren saelden die 'n zuhten des pflegen!

 

 

© Dr. Rüdiger Krüger, Rheda-Wiedenbrück 2006
Kontakt: mailto:siegfriedcarl@hotmail.com
letzte Änderung: 26.04.00

Wichtiger Hinweis zu allen Links dieser Seiten:
Mit Urteil vom 12. Mai 1998 - 312 O 85/98 - "Haftung für Links" hat das Landgericht (LG) Hamburg entschieden, dass man durch die Anbringung eines Links die Inhalte der eingebundenen Seite ggf. mit zu verantworten hat. Dies kann - so das LG - nur dadurch verhindert werden, dass man sich ausdrücklich von diesen Inhalten distanziert.
Ohne auf die Diskussion um dieses Thema im WWW weiter einzugehen, wären wir selbstverständlich übel überrascht, auf den von uns verlinkten Seiten Dinge zu finden, von welchen wir uns ausdrücklich distanzieren müssten!