Johannes Hadlaub

Home
Nach oben

 

 

Johannes Hadlaub

 

27. Johannes Hadlaub

1. Nieman volloben frouwen kan (SMS XXVII,53)

Nieman volloben frouwen kan,
wan sî bî tugenden wonent alse schône:
saelden krône sint ir ingesinde.
Wol in, wol iemer, des wünsch ich.
5 mich sol wol des muot zîhen in gemüete,
dicke ir güete ich sô wol bevinde.
Ein schoenez wîp, ein wîplîch
lîp:
diu süeze güete manc gemüete
sô suoz dürgât, sô
10 daz er frô muoz sîn der wunnen,
die dem liechten sunnen glîchent sich:
wîp sint sô maniger wunnen rîch.
Jâ waere ez wol, daz liebes vol
waer sîn gemüete, der ir güete
15 mit lob dicke tuot
lieplîch guot. jâ wol dien frouwen!
wan mac an in schouwen süezen schîn.
wan mac bî in wol froelîch sîn.
Sô stênt schôn ir tinne,
20 ir houbt, keln, nac, ir kinne,
ir brüstel, ir ougen,
des man sol wol dar war gerne nemen.
Der welt krôn sint frouwen;
gar süeze ist ir anschouwen.
25 ir ist vil sô reine.
manc frouwe guot tuot daz swaz wol mac zemen.
Und waer ez nicht ein zuoversicht
doch sendes smerzen mannes herzen,
swanne er sicht sô gar
30 wunnevar die schoenen frouwen,
doch gît im daz schouwen hôhen muot,
swie wê doch sendez jâmer tuot.

Sît mannes muot wirt so gar guot,
swann er mac schouwen schoene frouwen,
35 sô wurd er êrst frô,
kaeme ez sô daz er etslîche
wîplîch wunnen rîche solt umbvân:
sô möchte er êrst recht fröide hân!
Sî hânt lôs gebâren,
40 die reinen frouwen clâren,
gar lieplîch stêt ir kôsen;
dâ von wol wir ir doch noch mugen uns
fröwen von schulden sêre.
Wen verdrôz ie frouwen,
der sî recht kond geschouwen?
45 der wart nie, sicherlîche,
des dunket mich: ich kan an in wol wizzn sô gar hôch êre.
Wie möchte ein man iemer verlân,
im kaem ze sinne rechtiu minne
bî frouwen sô fîn?
50 liechter schîn dürgât sîn ougen
dâ sô lieplîch tougen: sô kumt er
in fröide und doch in sende ger.
Ez ist klein nicht daz guot man siht
an schoenen wîben. ez kan trîben
55 leit wol von dem man,
der wol kan entstân ir güete:
sô wirt sîn gemüete fröiden rîch.
wîp sint ze rechte minnenclîch.
Ir minnclîch lachen wunnesan
60 kan doch noch mangem wilden muot und sinne,
dâ bî minne sînem herzen bringen,
Ir wîplîch hende zartlîch wîz:
prîs ich gich wîbes bilden. manic gemüete
nâch ir güete muoz von schulden ringen.

65 Swenn ein schoen wîp ir schoenen lîp
sô schône treit und wol bekleit,
sô kumt sî dann sô gar
lieplîch clâr, sô wol ze prîse,
als ûz dem paradîse kom ir lîp.
70 ach wie sint sô guot schoeniu wîp!
Der wîp loen sint süez und lint.
swer der bevindet, der erwindet
an ir dienste nicht,
swiem geschicht, er müez dann sterben.
75 wan mac gerne werben umb diu wîp:
sî hânt sô minneclîchen lîp.
Ir wîplîch tanzen mannes muot
tuot sô frô, doch gar senelîche, der recht achtet
unde trachtet, wie lôslîch siz kunnen.
80 Minnenclîch stênt ir wîplîch kleit.
breit sol wol man ir wunne machen: mannes ougen
werdent tougen lieplîch vol ir wunnen.
Jâ mac der hân sô lieben wân,
der dik mac schouwen schoene frouwen,
85 wan er wirt dik sô
lieplîch frô, wan frouwen wunne
liuchtet sam der sunne. mannes lîp
fröit nicht sô wol sô schoeniu wîp.
Secht doch, swer vil gedenken wil
90 nâch frouwen bilde, der wirt wilde,
wan er sicht wol noch
wunne doch an schoenen wîben.
daz wirz iemer trîben! frouwen fîn
müezen vor allen wunnen sîn

 

 

© Dr. Rüdiger Krüger, Rheda-Wiedenbrück 2006
Kontakt: mailto:siegfriedcarl@hotmail.com
letzte Änderung: 26.04.00

Wichtiger Hinweis zu allen Links dieser Seiten:
Mit Urteil vom 12. Mai 1998 - 312 O 85/98 - "Haftung für Links" hat das Landgericht (LG) Hamburg entschieden, dass man durch die Anbringung eines Links die Inhalte der eingebundenen Seite ggf. mit zu verantworten hat. Dies kann - so das LG - nur dadurch verhindert werden, dass man sich ausdrücklich von diesen Inhalten distanziert.
Ohne auf die Diskussion um dieses Thema im WWW weiter einzugehen, wären wir selbstverständlich übel überrascht, auf den von uns verlinkten Seiten Dinge zu finden, von welchen wir uns ausdrücklich distanzieren müssten!