Wolfram v. E.

Home
Nach oben

 

 

Wolfram

von Eschenbach

 

9. Wolfram von Eschenbach

1. Den morgenblic bî wahtaeres sange erkôs (L 3,1 MF = KLD 69.I Moser/Terv.)

1 Den morgenblic bî wahtaeres sange erkôs
ein vrouwe, dâ si tougen
an ir werden vriundes arm lac.
dâ von si der vreuden vil verlôs.
5 des muosen liehtiu ougen
aver nazzen. sî sprach: 'ôwê tac!
Wilde und zam daz vrewet sich dîn
und siht dich gern, wan ich eine. wie sol iz mir ergên!
nu enmac niht langer hie bî mir bestên
10 mîn vriunt. den jaget von mir dîn schîn.'

2 Der tac mit kraft al durch diu venster dranc.
vil slôze sî beslussen
daz half niht; des wart in sorge kunt.
diu vriundîn den vriunt vast an sich dwanc.
5 ir ougen diu beguzzen
ir beider wangel. sus sprach zim ir munt:
'Zwei herze und ein lîp hân wir.
gar ungescheiden unser triuwe mit ein ander vert.
der grôzen liebe der bin ich vil gar verhert,
10 wan sô du kumest und ich zuo dir.'

3 Der trûric man nam urloup balde alsus:
ir liehten vel, diu slehten,
kômen nâher, swie der tac erschein.
weindiu ougen - süezer vrouwen kus!
5 sus kunden sî dô vlehten
ir munde, ir bruste, ir arme, ir blankiu bein.
Swelch schiltaer entwurfe daz,
geselleclîche als si lâgen, des waere ouch dem genuoc.
ir beider liebe doch vil sorgen truoc,
10 si pflâgen minne ân allen haz.


2. Guot wîp, ich bitte dich minne (L 9,1 MF = KLD 69.[VIII] Moser/Tervooren)

1 Guot wîp, ich bitte dich minne,
ein teil dur daz,
sît ich dir niht gebieten mac.
du gip mir die gewinne,
5 daz ich baz
an dir gelebe noch lieben tac.
Snel vür mich - wilder danne ein tier -
mac mir dîn helfe entwenken.
wilt an triuwe gedenken,
10 saelic wîp,
sô gîst ein liebez ende mir.

2 Du treist sô vestez herze
ûf mîn verlust.
wie sol der site an dir zergân?
eim mûzervalken, eim terzen,
5 den mac brust
nicht baz danne dir diu dîne stân.
Dîn munt ist ûf den kus gestalt,
dîn lachelîchez grüezen
mac mir wol gezüezen
10 sûre nôt.
sus hât dîn minne mîn gewalt.

3 Möht ich die saelde reichen,
diu sô hôch
ob mîner vröide stêt gezilt!
got muoz ir herze erweichen,
5 sît ez noch
der mîner swaere niht bevilt.
Man siht mich alze selten geil.
ein vlins von donrestrâlen
möht ich zallen mâlen
10 hân erbeten,
daz im der herte entwiche ein teil.

4 Ir wengel wol gestellet
sint gevar
alsam ein touwic rôse rôt.
diu schoene mir wol gevellet,
5 sist valsches bar.
ir ougen bringent mich in nôt.
Si dringent in mîns herzen grunt:
sô enzündet mich ir minne,
daz ich von ir liebe enbrinne.
10 an der stat
bin ich von der süezen wunt.

5 Ir schoene vröide machet.
durliuhtiec rôt
ist ir munt als ein rubîn.
swem sî von herzen lachet,
5 des sorge ist tôt.
sist mîn spilnder ougen schîn.
Ir vrömde krenket daz herze mîn.
ich stirbe, mir werde ir minne.
10 Vênus diu götinne,
lebt si noch,
si müeste bî ir verblichen sîn.

6 Ich wil des mînen ougen
sagen danc,
daz sî si vunden alsô guot.
die ich dâ minne tougen
5 sunder wanc,
diu hât gehoehet mir den muot.
Daz schaffet mir ir rôter munt:
ir minneclîchez lachen
kan mir wol gemachen
10 hôhen muot,
dâ von mir wirt ein vröide kunt.

 

 

© Dr. Rüdiger Krüger, Rheda-Wiedenbrück 2006
Kontakt: mailto:siegfriedcarl@hotmail.com
letzte Änderung: 25.07.06

Wichtiger Hinweis zu allen Links dieser Seiten:
Mit Urteil vom 12. Mai 1998 - 312 O 85/98 - "Haftung für Links" hat das Landgericht (LG) Hamburg entschieden, dass man durch die Anbringung eines Links die Inhalte der eingebundenen Seite ggf. mit zu verantworten hat. Dies kann - so das LG - nur dadurch verhindert werden, dass man sich ausdrücklich von diesen Inhalten distanziert.
Ohne auf die Diskussion um dieses Thema im WWW weiter einzugehen, wären wir selbstverständlich übel überrascht, auf den von uns verlinkten Seiten Dinge zu finden, von welchen wir uns ausdrücklich distanzieren müssten!